kalaallit oqaluttuatoqaanni toornat, uumasut inuunngitsullu pillugit atuagaq najoqqutassiaq assiliartalersugaq

KILIFFAK tassaavoq uumasorujussuaq meqqukkaaq, arfinilinnik – ilaannikkut qulinik – niulik. Nannumiit angineruvoq nioqarnermullu takkajaajulluni. Meqqui nuluani qaqortumik milaqarput, ilaanni tamarmi qaqortuinnaasarpoq, kusanaqimmallugooq piumaneqartaqaaq. Angingaarmanngooq ameeraanni illup iluata iigai tamaasa amersuata qallersinnaavai. Sermersuup eqqaani najugaqarpoq, nuna kiliortorlugu nerisassarsiortarpoq. Pisarigaanni nunaqqatigiit tamakkerlugit neqissaqartissinnaavai, saaniilugooq marloriarlutik neqineqqittarput. Pisariniarlugu malersoraanni oqilasoorsuummat mianersuuttariaqarpoq, annernartorsuarmik kiisisarami.
ILAANNIGOOQ ANGUT QIVIPPOQ, timaanullu aallarpoq nerisassarsiorluni. Apuukkami kamillarpoq, takulerpaa KILIFFASSUAQ nunamik kiliortuisoq. Siullermik qimerlooqqaarpaa kamini panersiisaa, takulluni ornilillarmani qimaasariaqalerpoq. QIVITTUUGAMI inummiit oqilaneruvoq, taamaattoq malersuisorsuup angujartulerpaa. Qupparsuaq qarsullugu pissippoq, malersuisorsua aamma pissippoq, quppallu tullissaa qarsullugu pissimmat KILIFFAAP qupparsuaq arajutsillugu sukkavallaarluni nakkarpoq toqullunilu.

atuagaq

Kalaallit oqaluttuatoqaanni silarsuaq assigiinngitsorpassuarnik navianartunik, naalanngittunik aamma tupinnartunik ulikkaarpoq. Maria Bach Kreutzmannip kalaallit oqaluttuatoqaat nuannariuaannarsimavai, ullulli ilaanni paasilerlugu ilisimasani qanoq annikitsigisut. Ikittuinnaat ilisimaneqarluartut tusaamaneqarluartullu kisiisa ilisimavai. Isumassarsivoq toornanut, uumasunut inuunngitsunullu ilisimasanik katersiniarluni, taakku ilisarnaataat najoqqutassiariniarlugu.
Mariap ilusilersuisartutut tunuliaqutaqarnini, Computer Graphics Art, The Animation Workshop/VIA University College Viborgimiittumit, toornat, uumasut inuunngitsullu nutaaliatut takutissallugit torrallassimavai – kalaallit inuunngitsunik oqaluttuatoqaat taamatut takusimanngisaannarpagut.
Bestiarium Groenlandica suliarineqarpoq paasisassarsiortunit, nunanilu avannarlernit ilusilersuisartunit eqqumiitsuliortunillu Maria Bach Kreutzmannimit aaqqissorneqarluni. Bestiarium Groenlandica ilisimasanik katersuiffiuvoq sukuiaaffiullunilu toornat, uumasut inuunngitsullu isikkui pisinnaasaallu pillugit, taamatuttaaq kalaallit oqaluttuarisaanerat angakkuersaartarnerallu pillugit.

atuakkioqataasut

Paasisassarsiortut: Maria Bach Kreutzmann, Ujammiugaq Engell, Robin Fenrir Mansa Hillestrøm aamma Qivioq Nivi Løvstrøm.
Assiliartalersuisut: Agust Kristinsson, Carina Lillegaard Løvgreen, Christian Fleischer Rex, Coco Apunnguaq Lynge, Jonatan Brüsch, Maja-Lisa Kehlet, Maria Bach Kreuztmann aamma Martin Brandt Hansen.