Juaaka Lyberthip oqaluttualiaa

”Juaap ugguarnini ilumooruterpaluuillugu arnat inuusuttut saniminiittut alarnaveerpai, qungujussaaruttutulluunniit ippoq. Nipangerluni isigitsiarpai arnat inuusuttut marluk, ikinngutini pinnarisanilu. Aappaa qernertunik nujalik aappaalu qaamasunik. Inuusuttut qiimasut iluserissut aallalernerminnik nuannaarutiginnillutik ikinngutiminnik ilaquttaminnillu  inuulluaqqusissallutik utaqqisut. Nukappissatulli allatulli aallaqataalinngitsutut Juaap nunaqqatimi arnartaasa aallartarneri uggorisorujussuuai. Ilami uku iluatinnaraluassusii.

“Ilissinnguit Ikastimut tikikkussi qallunaakassaat iluanaassamaat, pakkuteruloorlusi ammaloruttaqattaartarlerunisi aatsaat iluamik: “Åh naj, naj, naj, jaj blie dårlit, jalp maj piiger.”, Juaat piaaraluni kutanniarpaluissorluni qallunaatut oqaatsini naggaserlugit oqaqqippoq, ugguarnini quiasaarnermut saatinniaraluarlugu:”

atuagaq

Tassaavoq ukioq 1969. Uummannami angerlarsimaffimmini aasakkut atuanngiffeqareernermi kingorna Paul Erik Nuummi kost- aamma realskolimut uteqqippoq. 1960-ikkunni inuusuttut inuunerannik oqaluttualiaralugu atuakkiaq, imaralugit aarleqquteqannginnerit, asannilernerit, asanninnerit naalliuutaasut aamma inuiaqatigiinni allanngulersuni pikitsitsinerit. Aammali meeraanermit misigisimasanik kingunerlutsitsinerit, angajoqqaallu atugarisaa meeqqaminnullu pilluarnartumik siunissaqarnissamik neriuutaat.

atuakkiortoq

Juaaka Lyberth1952-imi Uummannami inunngorpoq. Ukiuni arfineq-marlunni meeqqat atuarfianni atuareerami Danmarkimi ukioq ataaseq atuariartortitaavoq, kingornatigullu Nuummi 2. præp.-imiissinnarluni ukiuni pingasuni Seminariap atuarfiani realskolimi atuartuulluni.
Juaaka nipilersortartuullunilu erinarsugassiortartuuvoq, allaaserinnittartuuvoq tusagassiutitigullu kalaallit nunaamiunik oqallissaarisartuulluni. Ukiorpassuarni Nunatsinni kulturikkut susoqarfinni annertuumik peqataasimavoq, nipilersornerup isiginnaartitsisartoqarnerullu akuuffigisarnerisigut, kiisalu kulturip illorsuisa Katuap Taserallullu 2010-p tungaanut ukiut 15-it aaqqissuussisartutut pisortatullu ingerlatseqataaffiginerisigut. Namminersornerullutik Oqartussat 2000-imi kulturimi suliniutilinnut nersornaasiuttagaannik aamma 2009-mi Koda Greenlandip immikkut ittumik ataqqinaammik nersortaasiuttagaanik nersornaaserneqarsimavoq.
Naleqqusseruttortut tassaavoq atuakkiaqqaataa.

naliliinerit

”Juaaka Lyberth peqatigalugu nuanneqaaq, atuakkiaalu allanut innersuussutigilluarsinnaavara” AG

 

”Romanen beskriver fint den rodløshed, som hersker, når man vokser op i et samfund, hvor andre har bestemt, hvilke muligheder man har i tilværelsen og hvilken livsbane man skal følge.” Ekstra Bladet – ”Atuakkiap ersersilluarpaa sumiiffeerunneq takornartaanngitsoq inuiaqatigiinni allanit aaliangerneqartartoq qanoq inuuneqassanerluni peroriartorsimagaanni”