Kalaallit Nunaanni suiaassuseqatiminnik aappaqartartut pillugit Hjalmar Dahlimit

“Inuugatta inuunerput nuannaralugu erligiuartariaqarparput”– Bia og Aqqalu
“Ilami allaat toqutsigimasunit atornerluisimasuniilluunniit maajugineqarnerusaratta” 

– Erik 

atuagaq

…inuugatta nunatsinni angutit anguteqatiminnik atoqateqartartut arnalllu arnaqatiminnik atoqateqartartut atugaat pillugit atuakkiaavoq. Anguteqatiminnik arnaqatiminnillu ilaqartartunik isiginnittaaseq ukiut ingerlanerini allanngoriartorsimagaluartoq suli suliassaaqaaq. Hjalmar Dahlip kalaallit qulingiluat suiaassuseqatiminnik aappaqartartut apersorsimavai, taakkulu oqaluttuanngorput unneqqarilluinnartut, namminneq inuunerminni misilittakkaminnik piviusunik oqaluttuarnerisigut. Aammattaaq atuakkap ingerlanerani Naalakkersuinikkut, inatsiseqarnikkut upperisarsiornikkullu ineriartorsimaneq Kalaallit Nunaanni Hjalmar Dahlimit ersarissarneqarpoq. …inuugattami nunatsinni anguteqatinut arnaqatinullu samminermut tunngasut nuannersut annernartullu oqaluttuarineqarput. 

atuakkiortoq

Hjalmar Dahl 1951-imi Qaqortumi inuuvoq. Perorsaasutut ilinniarsimasuuvoq, kingornalu ilinniaqqissimalluni attaveqatigiinnikkut tusagassiortutut. Ukiorpassuit ICC-mi (Inuit Circumpolar Conference) siulittaasuni ilaasortaasarsimavoq, saniatigullu aamma siulittaasuusimalluni Inuit Pisinnaatitaaffiinut Kalaallit Nunaata Siunnersuisoqatigiivini. Atuagaq Aasivik – Inuit isumasioqatigissiiffiat 2005-imi saqqummertoq atuakkiaqqaatigivaa.