Qooqa

Qulumini nunallit qilalukkerileraluarlutik malersukkatik tammaasivaat assarnimik anorlersukasinngormat. Angerlakkut sisamarsuit pisareruttorlugit Qulumimiut tikiummata innersuukkaluarpaat ningeqqullugit, ittualli Saqu nilleranilu avannamut nunaqarfimmik tungaanut sanguterluni aallariarmat ilaasa maliinnarpaat.
Unnuk taanna Pikiulinnguarmiut nuannateruttortut Qulumimiut nikallungasorsuupput. Angutitaat susaarsimallutik tikissimapput qilalukkanik malersoraluarnermik puisisiorsimannginnamik. Piniartoqqittarsuaq Saqu, aatsaat naleqquteruttortoq, annuttuinnaalluni issiavoq sumillu neriumanani oqassananilu. Isigalugu eqqumiippoq. Issianiarluni ilaanni qarsoruni killinnguatigut aappaluttuinnanngorluni kiagulillaruni! Piniartoqatai neritsiaraluaramik Saqu nerinngimmat neriunnaaginnarput. Saqu isumaannarmigut aalajangersaavoq, pilersaarutitoqqani – ilaanni taamaatittarsimasani – aatsaat taamak sakkortutigitillugu puttallaavaa.

atuagaq

Qooqa ikinngutaalu Mikisuluk alliartorput Attup eqqaani nunaqarlutik. Suli meeraasut angutaat inupiluup Saqup inuartarai. Taamaattumik nukappiaqqat taakku piaartumik ilaminnut pilersuisunngorput, ilungersorlutillu sungiusarnermikkut nakuarsuanngorput pinerrarissut.
Ileqqutoqqat naapertorlugit Qooqakkut ataataminnik toqutsisumut akiniaasussaagaluarput, kisiannili Qooqap akiniaaqattaanneq ersinermik toqqissisimanngittuarnermillu pilersitsisoq iluarinngilaa.
Qooqa kinguaariinnik oqaluttuat atuakkat sisamaasut siullersaraat. Atuakkat allat tassaapput Tulluartoq 1-2 aamma Taseraq pingajuallu.

atuakkiortoq

Ole Brandt (1918-1981), Nuummi Ilinniarfissuarmi ilinniartitsisutut inerami Qallunaat Nunaanni ilinniaqqissimavoq, kingorna Nunatsinni atuarfeqarfinni atorfeqartarsimalluni. Ole Brandt Landsrådimut ilaasortaasimavoq, Kalaallit Atuakkiortut peqatigiiffiannilu siulittaasuusarsimalluni. 1971-imi Qooqa saqqummerpoq, 1700-kkut aallartinneranni piniartut inooriaasiannik oqaluttuarinnittoq. Ole Brandt atuakkiani arlalinni peqataasimavoq oqaluttualiortutut taalliortutullu, aammalu oqaasilerinermut arlalinnik ilinniusiornikuulluni.