Taseraq Pingajuallu

Tulluartup oqaluttuarisaanerani oqaatigineqareerpoq ilaqutariissuit Taseralimmi aallaarsimasartut aallaarsimaffimmi tassani inunngortoqatuaramik nukappiaraq inunngortoq atseraat: Taseraq. Inunngortup nalliuttorsiutigineqarnerani Paatuup oqaluttuai illarnartunik ilallit eqqaamaneqarluassagunarput. Taseqqap ataatagaa Tulluartup nukaa Oquna, anaanagalugulu piniartorsuit Mikikkut qatanngutaat Qaajooq. Taamani Taseraq inunngormat inuit neriartukaasut ilaat Taseqqamut tunissutissaminnik nassartarsimapput. Ilaalli piareersimasoqanngitsut sanaqqaarlutik aqaguani aatsaat Taseqqamut pajussimapput. Tunissutissaminnik aatsisut ippassaammat Paatuup oqaluttuaanut illakutsoorsimasut nerisat sinnersuinik nerisinneqarput. Taavalu Taseqqap tunissutisiaasa ilaat eqqartulaarallartigik: Taseraq inunngormat nalliuttorsiukutsoorsimasut aqaguani ullaaralaannguaq ileqqumissut nataarnarniarlutik qaannamik aallakaapput. Ullorulaaliinnartoq Taseqqap angaavisa angajullersaat Miki Qaannamik allamik aappaqarluni tikisartorpoq. Sissaq tikilerlugulu timmut torlulaarpoq: ”Aana Taseqqap nataarnartassaa!” Aterfigeriallaraat nataarnarujussuaq angingaarami allerna aasiit qernaluttuinnarsuaq pisarillarneramiuk! Tassalu taannarsuaq Taseqqamut tunniuppaa. Qaannap aappaa aamma pilerpoq: ”Aamma aana aappassaa!” Taamalu oqarluni nataarnartarsuani Mikip pisaanit minnerulaaginnartoq aamma tunniuppaa.

atuagaq

Taseqqakkut ”ajoqersuut nutaaq” soqutigilerpaat, ajoqersorneqarumallerpullu kristumiutut kuisikkumallutik. Paasinarsivorli ajoqersugaaneq pitsaasuinnaanngitsumik nassataqartoq. Tamanna Taseqqakkut misillersaatigeqaat, nalornissutigilerpaallu sorleq ajunnginnerussanersoq – upperisaq nutaaq imaluunniit siuaasat upperisaat…

Taseraq pingajuallu, Qooqakkut kinguaariinnik oqaluttuat atuakkat sisamaasut kingullersaraat. Atuakkat allat tassaapput Tulluartoq 1-2.

atuakkiortoq

Ole Brandt (1918-1981), Nuummi Ilinniarfissuarmi ilinniartitsisutut inerami Qallunaat Nunaanni ilinniaqqissimavoq, kingorna Nunatsinni atuarfeqarfinni atorfeqartarsimalluni. Ole Brandt Landsrådimut ilaasortaasimavoq, Kalaallit Atuakkiortut peqatigiiffiannilu siulittaasuusarsimalluni. 1971-imi Qooqa saqqummerpoq, 1700-kkut aallartinneranni piniartut inooriaasiannik oqaluttuarinnittoq. Ole Brandt atuakkiani arlalinni peqataasimavoq oqaluttualiortutut taalliortutullu, aammalu oqaasilerinermut arlalinnik ilinniusiornikuulluni.