Henrik Saxgrenimit assinik atuakkiaq

 

Aallaqqaammut tarrup ataani inuk kisima angalaarusaartarpunga, illuni matoqqasuni qulliit qaamarngi kialaartut isigisarlugit. Taavali nunaqarfiup utoqqartaanut imminut kaffisoriaqqusalerpunga. Tamanna kingorna uggorinngisaannarpara, oqaluttuaasigummi paasilerpara Kalaallit Nunaanni qanga pissutsit ullumikkullu pissutsit akornanni piffissaq qanoq sivikissimatiginersoq. Tassami utoqqaat illuni nutaaliaasuni, imeqarlutillu innaallagialinni, kaffisoqatikka nunaqarfeerannguani qanganisarpaluttuni  illuni issunik ujaqqanillu qarmalinni peroriartorsimapput.

 

Henrik Saxgren, Siulequt

atuagaq

Ilimanaq 1700-kkunni aatsaat nunasiaatigineqalerpoq, taamanilu hollandermiunit arfannianit siullermik tikinneqaqqaarluni. Arfannianit tulliupput qallunaat ajoqersuiartortitat, ajoqersuiartortitallu Ilimanaq Claushavnimik atsersimavaat. Nunaqarfik Ilimanaq pisoqarfiujuaannarnikuuvoq, pisoqarfiujuaannarmallu inuit nunaqarfinnit mikinerusuneersut Ilimanamut nuuttarsimapput, namminnerlu nunaqarfigisimasartik inuerutsittarlugu. Massakkut Ilimanaq nunaqarfittut ataannarnissaa aarlerinarpoq; nunarfiup inuisa amerlassusaat 50-it inorpaat, iluatsinngitsumik aalisakkerivimmik ammaaqqeriaraluarnerup kingorna. Inuussutissarsiornikkut periarfissat nutaat ilagaat takornariaqarneq, inukilliartornerlu ilorraap tungaanut saatinniarlugu suliniartut amerlapput.
Iluliarsuit Ungataanni ilisarititsineruvoq nunaqarfimmut Ilimanamut tunngasoq. Henrik Saxgrenip ukiup kaajallakkiartorneri tamaasa nunaqarfimmiiffigisimavai tassanilu inuuneq malittaralugu assiliisarluni, soorluli aamma aavarianut eqalunnianullu ilaasimasoq. Nunaqarfiup utoqqartai kaffisoqatigisarsimavai kalaallillu kulturiat eqqarsaatigalugu qanga pisimasut ullumikkullu pissutsit akornanni piffissap sivikitsuinnaanera – aammali pinngortitarsuarmiinnermut tunngatillugu paasiuminaatsumik tupinnassusaa tiguartiffigisimavai.

atuakkiortoq

Henrik Saxgren Qallunaat Nunaanni assiliisartuni tusaamaneqarnerit ilagivaat. Kalaallit Nunaannik asanninini ilisimaneqaatigaa 2017-imilu upernaakkut atuakkiaa nersorneqarluartoq ULTIMA THULE saqqummerpoq. Qulinik atuakkiaqarpoq nunarsuullu ilarujussuani saqqummersitsisarsimalluni. Inuttaa suliaalu pillugit uani paasisaqarnerugit henriksaxgren.com