oqaluttualiaq Niviaq Korneliussenimit

 

„Annilaangavit?“ atsaga aperivoq. Ileqimisaartorpunga. „Maqaasinassaqaatit,“ oqarpoq. „Ukiumut marloriaannapajaaq takusarpugut, takunissatta tullissaanut maaniikkuma Danmarkimiikkumaluunniit assigiinnarpaa,“ illarlunga oqarpunga. Illaqatigineqanngilanga. Anaanap quersulaariarluni nerrivimmut sodavandinik ilioraaqquaanga. Naalallugu peqqussutai maleriarlugit anartarfiliarpunga. Maliina qanga aktiviusimanersoq marserpara. Akunnerit marluk qaangiupput. Ilaquttakka inimi illarpaluttut tusarnaarujoorlugit ullormut pingajussaa anarpunga. Sapaatip akunnera una assut naarloqattaarpunga. Kiagullungalu sajoqattaarpunga. Ullut amerlanngitsut qaangiuppata suna tamarmi qaangiutissaaq. Maliina aperivara unnummut takussanersugut. „Soorunami,“ minutsialunnguit ingerlanerini akivoq. Imminut tatigiummipiloorlunga inimut uterpunga. Eqqaannut ingikkama nipaarupput. Aggeraangama inuit taamaakkajuttarput, soqutiginngilarali. „Aallaruit arnamik maqaasisassaqarpit?“ ajaga aperivoq. Ileqimisaartorpunga. Anaana neriuuteqalersikkusunngilara. „Taannami kammalaatit tukkuffigiuaannakkat?“ anaana qungujulaqaluni iggavimmiit aperivoq. „Kujaannartarpugut,“ oqarpunga.

 

atuagaq

Imminut toquttumik nalaataqaqqaarpoq 13-inik ukioqarluni. Nammineq Tasiilami qaqqarsuit akornanni iliveqarusuppoq, iliveqarfimmi ilerrit ateqanngitsut Naasuliardarpimmiittut naasuusanik plastikkinik uleqqasut, apummi minguitsumi nilliasullusooq akornanni. Aappaqarpoq asasaminik, ilaqutaqarluni isumassuilluartunik, qanittumilu Aarhusimi universitetimi ilinnialernissaminut akuerisaaqqammerpoq. Silarsuaq ammavoq, sunali tamarmi pissusissamisuunngitsutut ippoq, kigaatsumillu silarsuaa nerukilliartulerpoq kingumullu kisitsineq aallartippoq.

NAASULIARDARPI oqaluttualiaavoq asanninnermut, ikinngutigiinnermut aliasunnermullu tunngasoq qulumaatsoq, aammali avaanngunartunik quiasaarutiginninnertalik – taavalu inuiaqatigiinni toqusortaminnik eqqartuisanngitsuni inissaminiinngitsutut misigisimanermut tunngasoq.

 

atuakkiortoq

Niviaq Korneliussen 1990-imi Nuummi inunngorpoq Nanortalimmilu peroriartorluni. Ilisimatusarfimmi Samfundsvidenskab ukiualunni ilinniariarlugu Aarhus Universitetimi psykologi ilinniarpaa. Niviap atuakkiortuunera aallartippoq 2013-imi naatsukullaliornermik allalluni unammisitsinermi Allatta!-mi ajugaaqataagami. Ukioq ataaseq qaangiummat atuakkiorngaarpoq takisuuliaq HOMO sapienne kalaallisut qallunaatullu nammineq allataminik. Atuakkiaa nunatsinni atuakkiornermi nutaaliaasutut mumisitsinertullu takutitsivoq, atuagassiami Politikenimi saqqaaniilluni, tamassumalu kingorna pisut sukkasuumik pilerput …
2015-imi HOMO sapienne Nunani Avannarlerni isumalioqatigiinniit atuakkialerinermut akissarsititsisarneranut innersuunneqarpoq kingornalu oqaatsinut assigiinngitsunut qulinit amerlanerusunit nutserneqarluni, isiginnaartitsissusiatullu takutinneqarluni maannalu isiginnaagassianngorsarneqarluni.
2020-mi Naasuliardarpi saqqummersinnginnerani Niviaq isiginnaartitsissusiamik allappoq Angutivik, atuakkanillu arlalinnik nutsigaqarsimalluni, nunatsinnilu inuusuttunut allannermi ilitsersuisutut atuuttarluni taamatuttaaq angalalluni allannermik pikkorissaasarluni, Kommuneqarfik Sermersuumilu Kulturambassadøriusimalluni, tapersersoqatigiillunilu suliniummi Imminornerit : 0 : Selvmord aallartitsisuulluni.

 

naliliinerit

Killormut Korneliussenip kalaallit atuakkiornerannut inuuneqartitseqqilernera sorujussuanngortinneqarnissaanut pissutissaqarluarpoq. Niviaq Korneliussen; atuakkamut nuannersumut pilluarujussuarit. Aamma Kalaallit Nunaat; pilluarujussuarit.
Kirsten Thisted, AG

Homo sapienne oqaluttuartariaatsimik nammineq pilersitsinikuuvoq.
Taama allappoq qallunaat aviisiat, Politiken

Niviaq Korneliussen sapiillunilu piginnaaneqarpoq…
Taama allappoq qallunaat aviisiat, Weekendavisen

Kalaallit Nunaanni atuakkialerinerup silarsuaani nipi nutaaq. Nipi maqaasineqarnikoq.
Taama allappoq qallunaat aviisiat, Kristeligt Dagblad