Aasarisseruttoraa…

Lusander Timuutiusimut
Timuutiusip siuaavi ataqqinarput, uangattaaq siulikka taamaapput, taakkunatullu ajorsaateqanngilanga. Asanninnera taassumap asanninneraniit anneruvoq. Timuutiusitut pisuutigaanga, pisuujunerunngikkuma. Unali ajorniannginnerniit pingaarneruvoq, Iimiannguup asavaanga. Sooq taava taanna nangartussavara? (Timuutiusimut saalluni) Timuutiusi, isertuunnagu oqarlanga: Niitarip pania Iliinna tiingaffigigakku, ilinnut asannilersillugu, taassumannguullu illit massakkut nuannaartoralutillu piumangaarpaatit uffa taama tamalikaartigisutit.

atuagaq

Siullerpaasumik isiginnaagassiaasa ilaat “A Midsummer Night’s Dream” tamakkiisumik kalaallisuunngortinneqarpoq ima taaguserlugu: “Aasarisseruttoraa…” Makka Kleist-imit, Nunatta Isiginnaartitsinermik Ilinniarfiata pisortarinikuusaanit, isiginnaagassiarlu Nunatta Isiginnaartitsisarfiani takutinneqarluni.
Isiginnaagassiaq atuakkatut atuarlugu isiginnaartitsissutitut takuneraniit allaanerusumik misigititsivoq.
“Aasarisseruttoraa…”-ta pingaarnertut inuttarivai asasariit sisamat, imaralugulu taakkua aappariilernissaminnut ilungersornerat. Orpippassuarmut pipput ulluinnarnilu silarsuaat anersaallu silarsuaat ataasiusutut ilerput.
Tassani silarsuarmi, sinnattuaqisutut misiginartumi, imminnut asanninnerat ilumoornersoq apeqquserneqarpoq, Shakespearillu quujasaarusiornermi atorneqarsinnaasut amerlaqisut asasariinnut aqqusaartippai.

isiginnaagassiortua nutserisualu

William Shakespeare inuuvoq 1564-miit 1616-mut. Nunarsuatsinni isiginnaagassiortartutut pingaarnertut isigineqarpoq, ullorlu manna tikillugu ilungersunartuliai, isiginnaagassiat pisimasuinnik aallaavillit, quujasaarusiaalu nunarsuarput tamakkerlugu suli isiginnaartitsissutigineqartuarput.

Makka Kleist Nunatta Isiginnaartitsinermik Ilinniarfiani pisortaanikuuvoq. Nunarsuatsinni oqaatsit nalunarluinnartut ilaannut Shakespearip nutserneqarnera imaannaanngitsoq suliaraa. Oqaatsinik assigiinngitsunik ilisimasaqarluarnini aallaavigalugu, isiginnaartitsisartutullu tunulequtani atorluarlugu Makka Kleistip Shakespearip isiginnaagassiaasa ilaat Inuit oqaasiisa ilaannut, kalaallisuumut, siullerpaajulluni tamakkiisumik nutserpaa.