oqaluttuatoqqat oqaluppalaallu kujataaneersut Malik Høeghimit aaqqissuussaq
Qaannat pilerisorsuullutik aallariartoraangata mattarteriarlutik imaanut teqqararaat taavalu malersuleraraat, ilaannilu saaqqutip tuffigileraangatik morsunniariartut puttaviannut qitsulluaannaaraat. Taamaallutik ilaanni puisinngitsooraraat, ilaannilu tammaallutik takuleraraat qaannap niutaavata ataatigut sorluinnaat nuisasut. Tikiserniaraluarlugit
morsoriarlutik kussarlutillu itiminnillu puaariarlutik tassa kingorna puisinavianngilaat. Qinaarigaluarlugillu tammaasarigamikkik angerlatarigamik tikittaraat tassaana qangali tikissimasut, aperisaraallu qanoq ilillutik angerlarsimanersut, oqartaraat aqqariarlutik immap iluatigut ingerlasaramik.
atuagaq
1700-kkut aallartilaarneranni kujataani pingaartorsuit ilagisimavaat tusaamasarsuaq Akamalik. Taanna pillugu oqaluppalaat kujataani kinguaariippassuarni pigineqarsimapput tamakkuuppullu 1930-kkunni naqiterisup Faré Høeghip ilaatigut katersorsimasai. Uunartup Kangerluarmiut eqqarleriiaassimapput Usulissuullu ernutaa Uujoorsuaq, inersimasunngorami inorersorsuanngortoq, Akamalip aamma eqqarlerisimavaa. Akamalip qanoq pinertutiginera eqqarliisalu perorsaasuisalu qanoq pingaarsimatiginerat atuakkami atuarneqarsinnaapput. Adolf Knudsenip qalipagaanik tamakku ilaatigut assiliartaqarput. Katersukkanut ilaapputtaaq oqaluttuatoqqat, qivittulersaarutit asanninnilersaarutillu. Kiisalu ilassutitut ilanngunneqarput “Iitivip unikkaartuai Aappilattumi” Faré Høeghip 1944-mi naqitigaa qangali pissarsiarineqarsinnaajunnaarsimasoq. Ajoraluartumik Farép katersukkani saqqummersissallugit angumerinngitsoorpai toqummallu periarfeerunneqarlutik. Nalaatsornerinnakkut oqaluttuat KNR-ip toqqorsiviani naneqqinneqarput maannalu ernutaata Malik Høeghip kitaamiusuunngortillugit allaasitaamullu allaqqillugit piareersimalerpai.
Kujataamiut oqaluttuatoqaat pigiunnaakkavut amerlagunaqaat makkulu saqqumersinnerisigut ilamininngui tammatsaalineqarput. Oqaluttuat aliikkutassaqqissuupput aammali Kalaallit oqaluttuariaasiannik paasiniaanissamut piukkunnaqalutik.