oqaluttualiaaqqat taallallu Pivinnguaq Mørchimit

”Arpakkaangama eqqarsaatit qarasanni atuakkatut qupperalersarpakka, ajunngitsumik malinnikkusuttarneq inuup kialluunniit iluminiitittarunarmagu kisimiissimassananga ilimagaara. Ingammik ilaquttannut attuumassuteqarpat, qanigisannulluunniit ajunngitsumik eqqaamaneqarusunnartaqaaq. Inuttut attuillunga ajortuliortarsimananga ilukkut salloqittaasarsimavunga, paasisaanissaralu toqqissisimananngittuaannarluni. Oqaatsit eqqunngitsut oqqamma pilersulissavai, aapparmali tusarnaartuarpai upperalunga. Misigisimavunga inuunerma atuagaa suli quppernikippallaartoq, isumakkeerfigitissanngikkumali inuusinnaanaviannginnama matu ilunniittoq nammineq matuersaatinnik parnaarluartarpara. Inuinnaagamami ullut tamaasa matup ammartarnissaanut timima tarnimalu pisariaqartittorujussuusaraluarpaa, nikeriarfigissanaguli qunugivara, kisianni angorusuppara.”

 

atuagaq

Atuagaq oqaluttuaaralianik qulingiluanik imaqarpoq taallanillu 14-inik imaqarluni. Taakkua kinaassutsimut tunngasuupput inuunermilu aporfiusinnaasut assigiinngitsut aqqusaarneqarsinnaasut.

Oqaluttuaaraliami atuakkap ateqaataani naapinneqarpoq inuttaq arpannermik aallutalik. Oqaluttuaaraliamilu allami Facebookip silarsuaanut takornariartinneqarpugut, piviusumili inuuneq taamaanngilaq.

atuakkiortoq

Tunivarma pilluaatinnik oqaluttuaariallu allat qulingiluat peqatigalugit atuakkami Inuusuttut nunatsinni – nunarsuarmilumi saqqummersinneqarput.
Pivinnguaq Mørch 1993-imi Upernavimmi inunngorpoq, 2006-imiillu Nuummut nuussimalluni. Michiganimi atuariarluni ukiinikuuvoq. GU-Nuummi ilinniarnertuunngorniarnikuuvoq, Qaqortumilu Niuernermik Ilinniarfimmi Issittumi takorniarissanik angallassisartutut ilinniarsimalluni. Maanna Ilisimatusarfimmi piorsarsimassuseq oqaluttuarisaanerlu ilinniarpaa.

2013-imi Nuummi Poetry Slamertoqaqqaarnerani ajugaasuuvoq. Arpaatit Qaqortut Pivinnguup nammineerluni atuakkamik saqqummersitseqqaatigivaa.