Nina Kreutzmann Jørgensenip oqaluttuaaqqanik imalinnik atuakkiaa

Kakkini siggumminiittut alullugit peerpaa qinganilu tujuulummi paffianik allarterlugu. Suut tamaasa naamasinnaalerpai. Klori, oquk, naasut paarnaqutiniittut, ivikkat isugutattut silaannarlu kissartoq. Suut tamaasa tusaasinnaalerpai. Niviugaaqqat assigiiaaginnarmik assoroorpaloqisumik nipiliornerat, anorrip sallaatsumik isussuppalunnera, anersaartorneralu imminut inissaqartippalunngitsoq. Ivikkaniit isugutak qitimini malugisinnaavaa. Atisani tamaasa piiaannapajunnikuuai. Mattaangalluni ivikkani qorsooqqissuni isugutattunilu innangavoq. Timaa soorlu manniup qalipaa saatsuaraq imaqanngitsoq, kapinartuararpassuanngorluni aserorluni quppasserangajalersoq.

 

atuagaq

Helga, Maalia, Lulu, Anna, Gudska arnallu allat Kalaallit Nunaanni, Islandimi, Savalimmiuni Danmarkimilu najugaqarput. Oqaluttualiaaqqani sammineqartut tassaapput ullutsinni arnat inuunerminni ajornartorsiutaat. Pineqartut ilaat tassaapput ulluinnarni misigisartakkat qatsunnarsinnaasut, neriniarnermi ajornartorsiutit, meeraassusermik misigisaqanngitsoorneq imminullu tatiginnginneq. Kisianni aamma paasinninneq, sinnattut neriuutillu sammineqarput. Ninap atuakkiaa nuuteeraliaalu NINA – Hun står i nordenvind ataatsikkut saqqummersinneqarput. Erinniani atuakkiornissamut isummassarsiorfigisimavai. Erinniai aamma assiliartalersorneqarsimapput eqqumiitsuliortartunit nunat avannarlerninngaanneersunit. Nipilersuusiai, oqaluttuaaraliai, erinniai assiliartaalu ataatsikkoortikkaanni taava nunani avannarliunerusuni inuuneq arnallu inuunerat takutinneqarpoq.

 

atuakkiortoq

Nina Kreutzmann Jørgensen kalaaliuvoq erinarsortartoq ilisimaneqarluartoq. Nina atuakkiamini saqqummersitserngaassutigivaa atugaq Avannersumi sassarpoq / Hun står i nordenvind. Ninap nipilersorneq, erinniorneq, atuakkiorneq assiliartalersuinerlu ataatsikkut atorlugit musikvideolianii Maalia saqqummersippaa. Annertunerusumik atuarsinnaavutit facebook.com/ninakj–mi.