atuakkiarineqartoq Kathrine Rosingimit Nina Spore Kreutzmannimillu assitalersorneqarluni
Anillattorlu aanaap tigummiani nasaq teqqialik Manumut takutippaa. ”Kiaana?” Manu aperipallappoq.
”Sissami iluatigisara,” aanaata akivaa.
Nasaq teqqialik errorneqarsimariarami qangali kusanannguarsi, asulu qinngoqutaa qillareqaluni. Manup tigullugu ooqattaarpaa asulu naammagilluaqalugu. ”Pissara?” Aanami tungaanut qiviarluni oqarpoq. ”Allammi pinavinngilaa,” aanaata akivaa.
atuagaq
Manu Kalaallit Nunaanninngaanneerpoq, Miulu Kinaminngaanniit. Imminnut ungasissorujussuugaluarlutik eqqumiitsumik pisoqarpoq, tassami imminnut sinnattorisalerput. Sinnattui ilumoorpasittorujussuupput, taamaammallu ilaquttaminnut kammalaatiminnut atuaqatiminnullu oqaluttuarisalerlugit, sivitsunngitsorlu nunarsuami tusagassiortut aamma eqqartulerpaat kammagiit tupinnartut, kammagiinneq immikkuullarissoq, aallartinnikuusorlu nasamik teqqialimmik nassaarnerminngaanniit. Meeqqanut atuffassissutissatsialak immaqaluunniit nammineerluni atuarneqarsinnaasoq arfineq-marlunniit aqqaneq-marlunnut ukiulinnut tulluartoq. Ukioq atualerfiusoq 2013-2014 atualerlaanut tunissutissatut toqqarneqarnikoq. Atuagaq nersornaammut Vestnordisk Råds Børne- og ungdomslitteraturpris 2013 aammattaaq Nordisk Råds børne- og ungdomslitteraturpris 2014 –imut innersuunneqarnikuuvoq.
atuakkiortoq
Kathrine Rosing Paamiiuni najugaqarpoq, sulisartuuninilu tamaat ilinniartitsisutut atorfeqarnikuulluni. Maanna soraarninngornikuuvoq.