Taallialiat Mariane Petersenimit, Niels Motzfeldtimillu assiliartalersukkat
Inngerpalaaq nipaaruppoq
break taartigaa break dance
oqaluttuaqattaanneq toquvoq
fjernsyni ilaqutariit naalagarilerpaat
qarleeqqat isersimmatit taarserneqarput
joggingbuksenik
puisip neqaa taarserneqarpoq pizzamik
puilasup ernga coca colamik
kigutit qajannaatsut taarserneqarput
kigutaasanik qaallorinnik
qilertit taarserneqarput afrohårinikilumummi
uagut inuit
siuarsimarsuaarpugut
atuagaq
Mariane Petersenip pinngortitamik nuannarisaqarnera inuunermilu naapitassat assigiinngitsut nuannersortai taalliamigut ersersittarpai Piniartorsuit kinguaavi. Mariane Petersenip atugartuunngorsimanermi isornartitani sakkortuumik quianartunngorlugilli saqqummiuttarpai. Atuakkami nassaassaapput taallialiat naatsut, pinngortitamut nuannarinninnermut qamannga pisut. Inuunerup tupinnartuliai aammalu quianartunit sinarsullit, nalitsinnilu inuit isumaliortaatsimikkut tigussaasunik pingaartitsinermik tuaviinnavik inuunerat, allaat sila pissusianik allanngoriartorneranik ajattuillutik.
atuakkiortoq assiliartalersuisorlu
Mariane Petersen Maniitsumi inunngorpoq 1937-mi. Nutserisutut ilinniagaqarpoq,1982-miillu 2004 tikillugu Nunatta Katersugaasiviani aqutsisuusimalluni. Mariane Petersen siornatigut saqqummersinnikuuai taallat ataatsimoortut Niviugak aalakoortoq allallu (1988), Inuiaat nunaallu (1993) aamma Asuliivik asuli (1997). Atuakkioqataanikuuvoq Kalaallisuuliorneq: arnanut kalaallisuuliornermik ilitsersuut, 2009-mi saqqummersumi. Aaammalu atuakkanik arlalinnik kalaallisuunngortitaqarsimalluni. Piniartorsuit kinguaavi / Storfangernes efterkommere atuagaq ataatsimi kalaallisoorpoq qallunaatullu, tamarmik atuakkiortumit allanneqarsimasut.
Assiliartalersuisoq Niels Motzfeldt, 1966-mi Nuummi inunngorpoq. Eqqumiitsuliornermik Ilinniarfimmi ilinniarsimasuuvoq. Atuakkami taalliat tuschmik imilertakkanillu qalipatanik kusanaqqinnaartunik assiliartalersorsimavai.