Tulluartoq 1-2

Qooqap kinguaavi ittorigaluamik anersaava, ataqqeqatigiilluni inuuneq, ingerlateqqillugu piniartorsuupput. Sungiusarneq aqqutigalugu nukittoorsuullutik imminnut tatigisut aamma oqaluttuarineqarput.

atuakkat

Qooqa ikinngutaalu Mikisuluk alliartorput Attup eqqaani nunaqarlutik. Suli meeraasut angutaat inupiluup Saqup inuartarai. Taamaattumik nukappiaqqat taakku piaartumik ilaminnut pilersuisunngorput, ilungersorlutillu sungiusarnermikkut nakuarsuanngorput pinerrarissut.
Ileqqutoqqat naapertorlugit Qooqakkut ataataminnik toqutsisumut akiniaasussaagaluarput, kisiannili Qooqap akiniaaqattaanneq ersinermik toqqissisimanngittuarnermillu pilersitsisoq iluarinngilaa.
Tulluartoq 1-2 kinguaariinnik oqaluttuat atuakkat sisamaasut akullersaraat. Atuakkat allat tassaapput Qooqa aamma Taseraq pingajuallu.

atuakkiortoq

Ole Brandt (1918-1981), Nuummi Ilinniarfissuarmi ilinniartitsisutut inerami Qallunaat Nunaanni ilinniaqqissimavoq, kingorna Nunatsinni atuarfeqarfinni atorfeqartarsimalluni. Ole Brandt Landsrådimut ilaasortaasimavoq, Kalaallit Atuakkiortut peqatigiiffiannilu siulittaasuusarsimalluni. 1971-imi Qooqa saqqummerpoq, 1700-kkut aallartinneranni piniartut inooriaasiannik oqaluttuarinnittoq. Ole Brandt atuakkiani arlalinni peqataasimavoq oqaluttualiortutut taalliortutullu, aammalu oqaasilerinermut arlalinnik ilinniusiornikuulluni.