Sørine Steenholdtip oqaluttuaaqqanik imalinnik atuakkiaa
Napparsimavimmi tarnikkut nappaatillit immikkoortortaqarfiannut unippunga – matoqqasumi – nakorsamit immikkut eqqarsartaatsikkut ilisimasalimmit misissugaritillunga. Meeqqakka maqaaseqaakka. Assorujussuaq. Eqqarsaatikka allamit saasarniarlugit pisuttuartalerpunga. Gangersuakkut uumasorpassuit assigalugit piginnittussaqanngitsutut sarsakataasarpunga. allorarnikka kiserujoortarlugit. Nakorsap sanioqquppaanga. Tikka, angutisunnitsoq naalluataangaarakku alla eqqaanngilara Farikasik. Qanorli massakkut takusinnaasuuguninga. Uumasupalaanut toquinnagassat ilaannut sanilliutissagaluarpaanga. Nammineq pisuunerarlunga.
oqaluttualiaaraq Zombiemiit
atuagaq
Atuagaq Zombiet Nunaat qiimmassaataasinnaanngilaq. Misigisat sakkortoorujussuit inunnut naallioreersunut aqqusaarneqartut Sørine Steenholdtip oqaluttuaaraliaani atuarneqarsinnaapput, ilaanneeriarluni nalunarsisarpoq ilumoortuunersut oqaluttuaaraliaannaanersulluunniit. Pinngitsaalitinneq, imminorneq, ikiaroornartumik atornerluineq, ikuallattoorneq biilinillu aallarussineq… inuit ikitsuinnaat nalaattagaat. Inuiaqatigiinnut isornartorsiuinerit qiiaamminartut.
atuakkiortoq
Sørine Steenholdt 1986-ii Paamiuni inunngorpoq. Maanna Oqaasilerineq, atuakkialerineq tusagassiutilerinerlu Ilisimatusarfimmi ilinniarpaa. Sørine 2012-imi Allatta!-p oqaluttuaaraliornermut unammisitsimmat ajugaasut ilagivaat, oqaluttuaaraliaq Anaanavit oqaasii naalattassavatit, Inuusuttut nunatsinni – nunarsuarmilu/Ung i grønland – ung i verdenmi saqqummersinneqarluni . Zombiet Nunaat Sørinep nammineerluni saqqummerseqqaatigivaa.
Titartakkat imaqarluartut Maja-Lisa Kehlet Hansenip titartagarivai.
naliliinerit
Inuiaqatigiinni pisartunik piviusunik saqqummiussineq pitsaanerpaagaangat.
Kikkut tamaasa uummataasigut eqqussavai. Atuartussat uummataat tillerulutsilissavai, qialersissalugit, amiilaammersissalugit ilaanneeriarlutillu atuagaq unitsiinnarlugu iligallartariaqartassavaat, qularnanngitsumimmi imminut ilisarisassagamik imaluunniit ima ersitigisassagamik, oqaluttuaq naammassillugu aatsaat kingusinnerusukkut atuartariaqartassallugu. Atuagarmi atuarakku nammineq taamaaliortariaqartarpunga.
Dorthe Olsen, Sermitsiaq
Inuusut toqungasut makisinniarlugit nillianeq.
Steenholdtip atuakkiaa Zombiet Nunaat nunaavoq misigissutsinik nuanninngitsunik aserornartunillu imalik, soorlu aliasunneq, uumissuineq, kamanneq, kanngusunneq sinnganerlu annertuumik atugaallutik, misigissutsilli taakku qalligaapput anigorneqarnatillu naggataatigullu annertuallaalerlutik ajunaarnernik, toqutsinernik imminullu toqunnernik kinguneqarlutik.
Allaaserisap oqaasertai allalluangaanngittuuppata oqaluttuallu tupaallannartunut saatinneqarneq ajortuuppata (naak oqaluttuat oqimaatsumi inissisimajuaannaraluartut), oqaluttuat atuarnissaat artornarpallaassagaluarput. Isumatsannartumik qaamaneqarnissaanik ujaasinarpoq – oqaluttuariaaserli pilluarnartoq atorneqarmat oqaluttuarineqarsinnaanngikkaluit tujorminartut oqaluttuarilersinnaalersippaat. Aamma Maja-Lisa Kehlet Hansenip assilialiornera torrallataaqisoq oqaluttuarnik qaammarissaavoq.
Kirsten Thisted, AG
Atuagaq ataatsikkut silataaniit iluaniillu allataavoq. Tamanna iluatitsissutigingaatsiarpaa. Puigorneqarsinnaanngilaq.
Taama allappoq qallunaat aviisiat, Politiken 
Atuagaq una pingaaruteqartorujussuarmik Kalaallit Nunaanni pisunik taartunik oqaluttuarpoq: nakuuserneq, kiserliorneq, annaasaqarneq pakatsinerlu.
Uanga isinni ”Zombiet Nunaat” New Zealandip “Once were warriors”-erivaa…
Taama allappoq Danmarkimi ilinniartitsisunut atuartitaanermut aviisiat, Folkeskolen.dk