Anne-Birthe Hove-p eqqumiitsuliarisartagai pillugit atuakkiaq Jørgen Chemnitzimit aaqqissuussaq

Ukiut ingerlanerini Anne-Birthe assilialiornermi periutsit atortullu assigiinngitsorpassuit atorlugit sulisarpoq. Qalipaasarpoq, qiperuilluni, qisuk saviminerlu atorlugit sulilluni – pingaarnerpaatulli naqitanik assilialiortuuvoq. Periusitoqqat pisariusut pikkoriffigilluinnarlugit sulisarpoq kanngussak saattukujooq suliarigaangamiuk, neriortitsilluni, kigartuilluni imaluunniit assinik nuutitsilluni silarsuarisaminik assilianngortitsiniaraangami.
– Naqitanik assilialiorneq atuakkamik atuarnertulli ippoq, qanimut passutassaavoq atuarluaqqissaarlugu, taamatut Anne-Birthe oqaluttuarpoq eqqumiitsuliorneq pillugu oqaluttuarisaanermik ilisimatuumut Anne-Marie Gjedde Olsenimut. Taanna Anne-Birthep suliaanik 2005-ip aasaani Nuummi saqqummersitsinermut annertuumut tunngatillugu inuttaa pillugu atuakkiortuuvoq.

Naqitanik assilialiornerup suliassartaani teknikkimut tunngasut Anne-Birthe Hovep ilungersorluni pikkoreqalunilu sukataaruttarpai, assilialiami pissusissaa nassaarinialeraangamiuk. Sullivia atortunik ulikkaarpoq, qalipaatit akuutissallu, peqqissaartumik paatsiveqanngitsumillu akuleriiaattut – soorlu aamma assilialiai taamatulli peqqissaarnermik paatsiveqannginnermillu takutitsisartut.

 

 

atuagaq

Anne-Birthe Hove (1951-2012) Kalaallit Nunaanni eqqumiitsuliortullammaasimavoq immikkut illuinnartoq. Anne-Birthe Hove København-ip Kunstakademiani, Eqqumiitsuliornermik ilinniarfimmi, Kunstpædagogisk skole-mi ilinniarsimasuuvoq ukiorpassuarnilu eqqumiitsuliortut peqatigiiffianni ilaasortaasarsimalluni.
Eqqumiitsuliamini assigiinngitsorpassuit atortarpai – kisiannili ilusilersuisuunera ilisarnaataajuaannarpoq.
Eqqumiitsuliortuuvoq imminut unammillertuaannartoq, taamaattumillu aamma isiginnaartuni unammillertarlugit. Atuakkami uani eqqumiitsuliortoq eqqumiitsuliortutullu pilersittagai kingumut qiviarneqarput. Atuakkap imarisai qanigisaanit, suleqatigisarsimasaaniit, inuttut nalunngisaanniillu pissarsiarineqarsimapput saqqummersitarisarpassuaaniillu aamma saqqummersitseqqinnikkut immerneqarsimalluni.

Atuakkap saniatigut nittartagaq annebirthehove.com aqqutigalugu eqqumiitsuliarisarsimasai allat nassaarineqarsinnaapput.

Atuagaq kusanartumik isikkoqarpoq iluanilu kassetitaqarluni.