Meeqqanut atuakkiaq Johan aamma Andreas Galtungimit

Hej, uanga Appelsiinamik ateqarpunga! Appelsiinaavunga ornikkusutannut sukkasoorujussuarmik timmisinnaasoq. Uagut appelsiinat inuit mamaraatigut. Appelsiinanilli kikkunnut tamanut naammattunik peqanngikkunik, assorsuaq assortuutilersinnaapput. Amerlanertigut akunnerminni qanoq iliorlutik agguaaqatigiissinnaanertik, taamaalillutillu tamarmik nuannaarsinnaanertik, paasiniaqqaanngivillugit kamaatilertarput. Qaagit nunarsuarmilu appelsiinat inuillu akornanni timmeqatigalunga angalaaqatigalunga.

 

atuagaq

Appelsiina timmisinnaasoq oqaluttualiaavoq alutornartoq appelsiina silarsuarmi tamarmi timmisaqattaarluni appelsiinamik nuannaaruteqarsinnaanermik pitsaanerpaamik ujaasisoq pillugu. Johan Galtungip ernerata, Andreas Galtungip, atuagaq imilertakkat atorlugit qalipaatigeqisumik alutornaqisumillu assiliartalersorsimavaa, taamalu oqaluttualiaq tiguartinnarnerullunilu itinerusutut misinnarsisillugu. Oqaluttuaq kulturini tamani meeqqanut (inersimasunullu!) oqariartuuteqarpoq naqiterisitsisarfillu milik suliniuteqarusuppoq atuakkap nunami maani siammarneqarnissaanut – ilaqutariinnut, paaqqinnittarfinnut atuarfinnullu, inuttut ineriartornissamik sammisaqarnermi atortussanut ilanngunneqarsinnaalluni.

atuakkiortoq

Akerleriissutinik isumaqatigiissaaniartartup eqqissinermullu tunngasunut ilisimatuup nunat tamalaat akornanni ilisimaneqartup Johan Galtungip qanilaartumik quianartumillu sammisaq imaannaanngitsoq matumuuna ingerlateqqippaa: Inuit akerleriissutinik aaqqiiniarsinnaanerat – aaqqiiniarsinaannginnerallu – aammalu akunnerminni ilakkuminaqatigiillutik inooqatigiissinnaanerat.

Johan Galtungip isumaliutersuutaa tassaavoq inuit akornanni akerleriissutit aammalu naalagaaffissuit akornanni akerleriissutit assiigiimmik anigorniarneqarsinnaasut: Illuatungeriit marluusut akornanni akerleriissutit tamarmik assigiinngitsunik tallimanik inerneqarsinnaapput. Taakkunani marluk tassaapput arlaata ajugaasinnaanera. Pingajuat tassa imminnut naaperiarsinnaanerat, tamannali uanga akerleraara affaannarmik angusaqarfiummat. Sisamaat tassa qaangiineq ajungitsoq, takorluuisinnaassuseq akerleriissutsimillu sangutsitsineq atorlugit illuatungeriit piumasaannik angusaqartitsineq. Soorlu assersuutigalugu inuit marluk appelsiina avissagunikku, qalipaanik kagiliorsinnaapput inerittussaalu nunamut ikkullugit. Inernissat tallimaat tassaavoq aaqqiineq ajortoq, illugiit tamarmik piumasaqaatiminnik atorunnaarsilluinnarlutik. Soorlu immaqa appelsiina inummut allamut tunniullugu, atuakkiortoq norgemiut aviisianni apersorneqarluni taama oqaaseqarpoq. Taannattaaq isumaqarpoq meeqqat inersimasuniit pikkorinneroqisut matumani qitiusumik paasinninnissamut taamalu 73-inik ukioqarluni siullerpaamik meeqqanut atuakkiorsimalluni, oqaatsinut qulinut nutserneqareersumik.

 

Allaaserinnittartut allapput:

Atuagaq angajoqqaanut, akerleriissutit pillugit meeqqaminnik oqaloqatiginnikkusuttunut atuarfinnullu, pimmatiginninnerup sakkortusigaluttuinnarlunilu siaruaakkaluttuinnarfianut, inassutigerusunnaqaaq.
Laila Ramlau-Hansen, AG

Sulimi paasinngilara akerleriissutinik aaqqiiniarneq qanoq ittoq pitsaanerpaajunersoq. Aaa, immaqaana taamaatussaasoq!!!! Atuartussap nammineq apeqqut taanna isumaliutigilissavaa (…) Atuagaq atuakkanut ilisivinnguanni pisaanernut ilaassaaq.
Aminnguaq Dahl Petrussen, Sermitsiaq