Avalanneq

oqaluttualiaq Cecilia-Karla Olsenimit Arnannguaq Høeghip ilusilersugaa

“Uffami… ilumut taamani pisimasuuvoq, qaammat august 1967 Danmarkiliarlunga avalakkama. Eqqaamavara aallalersunga aanama ujamminik tunimmanga. Eqqarsaatillu aakoralaannguit”

 

atuagaq

Celina meerannguulluni Qallunaat Nunaannut ilaqutariinnut nalusaminut ukiiartortitaavoq. Tappavaniinnerani pisoqarpoq niviarsiaqqap tarnimigut ikilerneqaatigisaanik. Pisimasoq tamanna Celinap inersimasunngornissami tungaanut kimulluunniit oqaatiginngilaa, inuunermini anniaatinit malersorneqartutullusooq misigisaqaatigisaminik.

Tamatuma kinguneranik inuuneq, inuiattut inissisimaneq nunasiaanerullu kingunerisai pillugit eqqarsaatigisartagai malinnaaffigaagut. Eqqarsaatit tigoriaannarnik inerneqaratik apeqqusiinernik pilersitsisut atuartussamullu eqqarsalersitsiniartut.

Atuakkami eqqarsaatit ullorsiutinilu allattukkat aqutaannik ullumikkut pisuniit qanga pisimasut uterfigineqartarput, ilaatigut pissutsit qanoq allanngorsimatiginnerannik takutitsiffiusumik.

 

atuakkiortoq

Cecilia-Karla Olsen1954-imi Sisimiuni inunngorpoq.

Eqqartuussivimmi allatsitut kingornalu eqqartuussissuserisumut allatsitut ilinniarsimavoq. Kalaallit Nunaanni Eqqartuussiveqarfimmi ukiut qulit missaanni sulivoq tamatumalu kingorna naatsorsuuserisutut kukkunersiuisumullu ikiortitut sulilluni. Ukiuni tallimani nammineq naatsorsuuserisutut eqqartuussissutinullu ikiuisartutut suliffeqarfiuteqarpoq. Cecilia-Karla Olsen 2008-mi peqqissaasutut naammassivoq 2009-milu napparsimasunik ikiuinermi bachelorinngorluni. Maannakkut Sisimiut Peqqissaavianni peqqissaasutut atorfeqarpoq. Ueqarpoq, paneqarluni, ningaaqarlunilu ernutaqarluni.
Sisimiuni qimarnguip, Oqqiffiup, 1984-imili pilersinniarnerani suliniaqataavoq sulilu peqataalluni.
Avalanneq atuakkiaani siullersaavoq, nammineq misilittagaanik misigisimasaanillu tunngaveqartoq.