Eqqumiitsuliortut kattuffiat KIMIK aallaavigalugu assinik atuakkiaq Tupaarnaq Rosing Olsen-mik Aaqqissugaq

Maanna ukiuni 20-nngulersuni eqqumiitsuliortut peqatigiiffiat KIMIK kalaallit eqqumiitsuliortarneranni sunniuteqarsimalerpoq. Kimik kalaallisut nukimmik isumaqartinneqarpoq. Tassaavorlu uagutsinni apeqqutaatinneqartoq. Imaanngilaq nipituuliuutaannaasut nukigigivut. Nukitta ilaanniippoq maannakkorpiaq inuuneqarsinnaanerput, nipaassutsimiissinnaanerput itisuumillu anersaartorsinnaanerput.

Buuti Petersen, Siulequt

atuagaq

Eqqumiitsuliortut kattuffiat KIMIK 2015-mi upernaakkut ukiut 20-inngortorsiorluni nalliuttorsiorpoq. Atuakkap nalliuttorsiornermi saqqummersitap aallaavigaa KIMI-p oqaluttuassartaa, ineriartornera maannakkullu ilaasortaasut saqqummersittagaallu sammineqarlutik.
Eqqumiitsuliortut tamarmik eqqumiitsuliornerup silarsuaanut attuumassuteqarnerminnik oqaluttuarput eqqumiitsuliarisimasartillu aaliangersimasut saqqummersillugit. Atuakkap tunuani eqqumiitsuliortut CV-annik ilanngussisoqarsimalluni.