meeqqanut atuagaq Naja Rosing-Asvidimit

 

”Maanna naalagara ikioreerakku anersaat silarsuaannut utertariaqalerpunga,” Aqipi eqqarsarpoq angakkullu tupianut timmilluni uterluni. pjeew… Tassanngaannaq qarsup attungajavillugu saneqqutitsiarpaa. ”Aa, uniorpat, nukappiaraq pisissimik pinnguartoq nilliavoq, qarsunilu arpalluni aallugu. ”Nuka, eqqoqinavakkit mianersoriarit,” nukappiaraq anginerusoq suaarpoq norsanilu unaaminut ikkullugu. Aqipip paasilerpaa toraajuneqqusaattut akornanniilluni, annilaarnermillu orpikkat akornannut toqqorterpoq.

atuagaq

Aqipip naalagaa, angakkoq, asimioqarfimmi sanilerisaminni nannunniartartorsuarmut iverluni ajorsaratarsinnaavoq, taamaattumillu ikiortinnguani toornaarannguaq aggersartariaqarlugu.
Asimioqarfimmi pisorpassuit Aqipip pissanganarluinnartippai, timmerujoorlunilu alapernaarusaalerpoq – meeqqat meerartaqarlutik angajoqqaajusaarlutik pinnguartut, killutigut igaat mamarunarluinnartut – arnaq tivasoq – piniartutoqarsuarlu pissanganarluinnartunik piniarnilikkersaartoq.
Naja Rosing-Asvid-ip oqaluttualiaa kusanarluinnartunik titartarluakkanillu assiliartalersukkap, qanga kalaallit piniartut kulturiat ullutsinni meeqqanut uummaarissumik oqaluttuaraa. Aqipi aasivimmiittoq meeqqanut kikkunnulluunniit naleqquppoq.

atuakkiortoq

Naja Rosing-Asvid arkitektitut ilinniarsimasuuvoq, saniatigullu nammineq imminut eqqumiitsuliortutut ilinniarsimasuulluni saqqummersitanik ulikkaartoq. Ukiorpassuarni Nunatta katersugaasiviani sulinikuuvoq, taannalu isumassarsiorfigisarsimallugu tassanissaarlu Aqipi pillugu oqaluttuaq isumassarsiarisimavaa. Kommuneqarfik Sermersuuminngaanniit 2014-imi kulturikkut nittarsaassisussatut taaneqarpoq. Naja Rosing-Asvid pillugu paasisaqarnerorusukkuit  www.najarosingasvid.dk alakkaruk.

atuakkat allat atuakkiortumit

Aqipi – toornaarannguaq
Ivalo & Minik