titartakkanik atuakkiaq Christian Fleischer Reximit
atuagaq
Kikkut tamarmik nunatsinni maani najugaqartut Kaassassuk, iliarsukkuluk, nunaqqatiminit tamanit ajortumik pineqartoq pillugu oqaluttuaq nalunngilaat nuannareqalugulu. Arnarsiarsuatali angutillu utoqqaap kisimik asavaat ikiortarlugulu. Kaassassuk asimukarpoq, tamaanilu Pissaap Inua aggersarlugu, taassumalu pissarsuanngortippaa. Kaassassuup maanna tamaasa sapersissinnaanngorpai – ilanngullugulu: Ajortumik
pinnitsigisimasani tamaasa akiniarsinnaanngorpai. Akiniaanerli isumakkeerfiginninnermit pitsaaneruva?
atuakkiortoq
Christian Fleischer Rex 1977-imi inunngorpoq. Viborgimi Animationsskolemi ilinniagaqarpoq, nunallu tamat akornanni filmiliani titartakkanillu filmiliani arlalinni suleqataasimalluni, ilaatigut Asterix og Vikingerne suleqataaffigalugu. Nuummi ussassaarusiorfimmik Deluxus Studiomik pilersitseqataavoq.
Titartaganngorlugu atuakkiami siunertarineqartoq tassaavoq oqaluttuatsialammik qaqugukkulluunniit naleqquttuartussamik oqaluttuarnissaq, peqatigisaanillu kinguaariinnut peroriartulersunut nunatsinni kulturikkut kingornussatta ilamininnguinik tunniussisinnaanissaq, kingulliarsuimmi Spiderman Supermanilu sungiusimanerulersimagunarmatigit – peqatigisaanillumi oqaluttuaq nunatta avataani nunarsuarmioqatitsinnut tusartikkumaneqarpoq. Taamaattumik titartaganngorlugu atuakkiaq oqaatsit pingasut atorlugit saqqummersinneqarpoq: kalaallisut, qallunaatut tuluttullu.