apersuineq aallaavigalugu atuakkiaq meeqqanik sumiginnaanermut tunngasoq Lise Andersenimit

Kaaleraangama pisiniarfiit ilaanni nerisassannik tillinniartarpunga. Iffianik qallersuutinik assigisaannillu. Soorunami taava paasitippunga. Anaanarsiara kommunimit oqaloqatigiumaneqarpoq. Uanga ilaanngilanga. Taavalu aalajangiunneqarpoq ilaqutariinni allani qitornarsiaanngussasunga. Tamatuma kingorna ataasiaannarlunga anaanarsiara pulaarpara. Kisianni Facebookimi ikinngutigaara.

Kalle

atuagaq

 

“Angajoqqaat atornerluinerat persuttaasarnerallu oqaluttuani qulini uteqqiaffiujuarput, meeqqalli aamma kaattarsimapput qiiasarlutillu. Meeqqat pisariaqarnerinnartigulluunniit isumassorneqarsimanngillat. Oqimaatsunik annaasaqartarsimapput, toqu toqumillu sioorasaarneqarneq inuuneranni ilaaginnarsimallutik. Allanit malugineqarsimanngillat, akuliullutik ikiuisinnaasunit. Sumiginnaanermi atugassarititaasut taamaattuugajupput, Kalaallit Nunaanniippat Danmarkimiikkaluarpalluunniit.

Matuma siuliani atuagassat atuartussat ilaannut annilaarnarsinnaapput, taamaattorli atuagaq neriuummik ulikkaarpoq. Oqaluttuanimi tusarpagut meeqqat sumiginnagaasimagaluaqalutik inuunermik toqqaasimasut, ataasiakkaarlutillu artorsaateqaraluaqalutik inuttut ineriartortut. Akiuussinnaassuseq tamanna suminngaanneersoruna? Qanoq ililluni iluatsitsisoqarsinnaasimava?” 

Psykolog Inger Thormann
(atuakkap siulequtaaniit)

Lise Andersen arlaleriarluni piffissami killilimmi Kalaallit Nunaanni sulisarpoq. Kingullermik Kalaallit Nunaanniippoq pisortat suliniutaanni nutaami suleqataalluni, peqqissaasut arnanik naartuunik assigiinngitsunik ajornartorsiutilinnik pulaartarlutik suleqateqarneranni. Ajornartorsiutit aningaasaqarnermut, isumaginninnikkut inuttullu nukissanut aammalu imigassamik hashimilluunniit ajornartorsiorneq pissutigalugu atugarliornermut tunngasuupput. Aammalu tarnikkut kinguaassiuutitigullu innarligaanermut tunngasuullutik.
“Arnat naartuut inuunerminnik oqaluttuukkaagannga, uannut paasiuminaassinnaavoq qanoq ilillutik maannakkut inuunerminnut killissinnaasimanersut. Imminut aperisarpunga kalaallit akornanni nukissaqartoqarnersoq immikkut ittumik?”

Meeqqat angerlarsimaffiat Uummannaq Kalaallit Nunaanni meeqqanik sumiginnagaasimasunik inissiiviusinnaasut ilagaat. Meeqqat angerlarsimaffiata tapersersuineratigut tassani najugaqarnikuusimasut attavigaakka meeraanerat peroriartornerallu pillugit apersorumallugit. Inuillu qulit 23-it 43-llu akornanni ukiullit inuunertik pillugu oqaluttuarumapput, nalunngereerlugu atuakkami uani taakku saqqummerumaartut.

atuakkiortoq

atuakkiortoq Lise Andersen (i. 1945) peqqissaasutut ilinniarsimasuuvoq. Atuakkamik saqqummersitseqqaarpoq 1991-imi, taamanikkumiillu 25-nik amerlanerusunik saqqummersitsisarluni – atuakkiortoq annerusumik paasisaqarfigerusukkukku aammalu atuakkiai allat takorusukkukkit uunga nittartagaanut iserlutit takusinnaavatit www.lise-andersen.dk